ការគំរាមធ្វើបាតុកម្មរបស់គណបក្សសង្គ្រោះជាតិជារឿយៗ ការប្រកាសធ្វើបាតុកម្មតទល់របស់គណបក្សប្រជាជនកម្ពុជាទៅនឹងបាតុករ របស់គណបក្សប្រឆាំងវិញ (បន្លាមុត យកបន្លាជោះ)។ សារ ទាំងពីរនេះបានធ្វើអោយប្រជាពលរដ្ឋខ្មែរមានភាពភ័យខ្លាចយ៉ាងខ្លាំង នៅក្នុងរយៈពេលប៉ុន្មានថ្ងៃក្រោយការបោះឆ្នោតកាលពីថ្ងៃទី២៨ខែកក្កដា កន្លងមកនេះ។
ប្រជាពលរដ្ឋខ្លះខ្លាច នាំគ្នាទៅដកប្រាក់នៅក្នុងធនគារ អ្នកខ្លះកក់ប្រាក់ទិញដីហើយ លែងហ៊ានយកវិញ អ្នកខ្លះមិនហ៊ានបញ្ជារទិញឥវ៉ាន់បន្ត អ្នកខ្លះមិនទាន់ហ៊ានបោះទុនវិនិយោគបន្ត។ ពួកគេមិនទាន់ហ៊ានធ្វើអ្វីទាំងអស់ដោយសារតែពួកគេរង់ចាំមើលការចចារ របស់គណបក្សឈ្នះឆ្នោតទាំងពីរ។
ប្រជាពលរដ្ឋមួយចំនួនធំបាននិយាយថា បើបោះឆ្នោតហើយពិបាកយ៉ាងដូច្នេះ អាណត្តិក្រោយ ពួកគេនឹងឈប់ទៅបោះឆ្នោតហើយ។ បើបោះឆ្នោតហើយ អ្នកស្រលាញ់អំណាចមិនចេះឯកភាពគ្នា ឬមិនចេះចែកអំណាចគ្នា ហើយគិតតែពីចង់បង្ក«សង្គ្រាម»នោះ ពួកគេនឹងអស់ជំនឿលើមេដឹកនាំហើយ។
ពាក្យថា «សង្គ្រាម» ឬភាពចលាចលធ្វើអោយប្រជាជនខ្មែរចាប់ពីអាយុ៤០ឡើងទៅនឹកឃើញឡើងវិញពី អតីតកាលរបស់ខ្មែរដែលធ្លាប់ញាំញីទៅដោយសង្គ្រាម។ មិនមែនតែប្រជាពលរដ្ឋដែលមានវ័យចំណាស់ទេដែលស្អប់សង្គ្រាមនោះ សូម្បីតែយុវជន និងកុមារតូចៗក៏ស្អប់សង្គ្រាមដែរ។
នៅយប់ថ្ងៃបោះឆ្នោតទី២៨ខែកក្កដាឆ្នាំ២០១៣កន្លងមកនេះ ស្ថានភាពនៅទីក្រុងភ្នំពេញមានភាពច្របូលកច្របល់បន្តិច ពីព្រោះ គេសង្កេតឃើញមានការពង្រាយកងកម្លាំងប្រដាប់អាវុធនៅតាមដងផ្លូវ។
ទិដ្ឋភាពនេះបានធ្វើអោយទីក្រុងភ្នំពេញក្លាយទៅជាទីក្រុង ស្ងប់ស្ងាត់។ ស្ងប់ស្ងាត់សម្បកក្រៅ ប៉ុន្តែប្រជាពលរដ្ឋភ័យស្លន់ស្លោ ទាក់ទងគ្នាតាមទូរស័ព្ទដើម្បីចង់ដឹងព័ត៌មានផ្សេងៗពាក់ព័ន្ធទៅនឹង ស្ថានការណ៍ផ្សេង។
ក្នុងខណៈពេលដែលស្ថានការណ៍កំពុងច្របូកច្របល់ គេលឺសូរសំឡេងជជែកគ្នារវាងគ្រួសារមួយ៖«ពុកមានបញ្ហាអ្វីកើតឡើង?»។ ឪពុកឆ្លើយវិញថា៖«អាចផ្ទុះអាវុធ?»។ កូនបន្ត៖«ពុក កូនមិនត្រូវការសង្គ្រាមទេ កូនត្រូវការពេលវេលារៀនសូត្រ កូនត្រូវការ ការប្រកួតប្រជែងជាមួយប្រជាជាតិអាស៊ានផ្សេងទៀត។ បើមានសង្គ្រាមខ្ញុំមិនអាចបន្តការសិក្សាបានទេ»។
ឪពុកឆ្លើយតប៖«កុំខ្លាចពេក នៅអោយស្ងៀម»។ កូនបន្ត៖«ពុកចេះតែថាមិនអី ដោយសារពុកចាស់ហើយ ចំណែកខ្ញុំ ខ្ញុំនៅក្មេង ខ្ញុំត្រូវការសម្រេចគោលដៅរបស់ខ្ញុំ គឺការសិក្សា»។ អ្វីដែលកុមារា អាយុ ១៣ឆ្នាំរូបនេះ បានជជែកគ្នាជាមួយឪពុករបស់គេយ៉ាងដូច្នេះ បានបង្ហាញយ៉ាងច្បាស់ថា ប្រជាពលរដ្ឋខ្មែរមិនត្រូវការឡើយសង្គ្រាម និងភាពច្របូកច្របល់។
អ្នកនយោបាយខ្មែរ ដែលត្រូវបានគេគិតថា មានភាពចាស់ទុំផ្នែកនយោបាយនោះគួរតោងគិតពីបំណងប្រាថ្នារបស់ ប្រជាពលរដ្ឋខ្លួនឯងផង ពោលគឺចៀសវាងគំនិត«ល្មោភអំណាច»បម្រើផលប្រយោជន៍អោយក្រុមមនុស្សមួយ ក្តាប់តូច ហើយរុញច្រានប្រទេសជាតិ និងប្រជាពលរដ្ឋរាប់លាននាក់អោយធ្លាក់ចូលទៅក្នុងភ្លើងសង្គ្រាមឬ ភាពចលាចលនោះ។
បាតុកម្ម ឬកុបកម្ម ដែលអាចរុញច្រានអោយមានភាពចលាចល ឬសង្គ្រាមផ្ទៃក្នុងនៅក្នុងប្រទេសនោះ មិនត្រូវក្លាយជា«ជម្រើស»ឡើយ៕
ប្រភពពី ថ្មីៗ
