កម្លាំងគ្រាប់ផ្ទុះបានធ្វើឱ្យខូចខាតដល់បង្អួចកញ្ចក់ធនាគារអេ ស៊ីលីដា ដែលមានចម្ងាយប្រមាណ២០ម៉ែត្រពីកន្លែងកើតហេតុ និងបង្កឱ្យមានការខូចខាតដល់របងខ្លោងទ្វារនៃតុលាការសាលាដំបូង រាជធានីភ្នំពេញមួយផ្នែក ព្រមទាំងកញ្ចក់ បង្អួច និងប៉ាណូផ្សាយពាណិជ្ជកម្មនៅជាប់នឹងជញ្ជាំងផ្ទះប្រជាពលរដ្ឋក្បែរ ទីតាំងកន្លែងកើតហេតុផងដែរ ។
ក្នុងដំណាក់កាលជំហានដំបូងក្រោយពេលកើតហេតុភ្លាមៗ សមត្ថកិច្ចមិនទាន់អាចវាយតម្លៃសន្និដ្ឋានបានថា គ្រាប់ដែលគេដាក់បំផ្ទុះឱ្យឮសូរកក្រើកទាំងយប់ តែមិនធ្វើឱ្យមានគ្រោះថ្នាក់ដល់មនុស្សម្នានេះ ជាប្រភេទគ្រាប់អ្វីពិតប្រាកដ និងមានមុខសញ្ញាច្បាស់លាស់នៅឡើយទេ ខណៈដែលនៅកន្លែងកើតហេតុគេឃើញមានវត្ដមានឯកឧត្ដម ជីវ កេង ប្រធានសាលាដំបូងរាជធានីភ្នំពេញ លោកឧត្ដមសេនីយ៍ឯក ជួន សុវណ្ណ អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ លោក សុខ រឿន ព្រះរាជអាជ្ញារងអមសាលាដំបូងរាជធានីភ្នំពេញ ព្រមទាំងសមត្ថកិច្ចពាក់ព័ន្ធជាច្រើនរូបទៀត ។
ទោះយ៉ាងណា មជ្ឈដ្ឋានដែលបានទៅអង្កេតដល់កន្លែងកើតហេតុទាក់ទងនឹងករណីបំផ្ទុះ គ្រាប់ឱ្យឮសូរកក្រើកទាំងយប់នេះ បាននិយាយថា នេះគឺជាសកម្មភាពមួយដែលធ្វើឱ្យមានបរិយាកាសវឹកវរ និងជ្រួលច្របល់នៅមុនពេលដែលគណបក្សនយោបាយប្រឆាំងប្រកាសព្រមាន ទុកជាមុនថា នឹងធ្វើមហាបាតុកម្មប្រឆាំងនឹងលទ្ធផលឆ្នោត ក្នុងករណីដែលមិនមានដំណោះស្រាយសមស្របតាមការស្នើសុំរបស់គណបក្ស សង្គ្រោះជាតិ លើការបង្កើតឱ្យមានគណៈកម្មការពិសេសស៊ើបអង្កេតភាពមិនប្រក្រតីនៃការ បោះឆ្នោត ហើយក៏ជារូបភាពមួយចាត់ទុកជាការបំភិតបំភ័យទៅដល់អារម្មណ៍ប្រជាពលរដ្ឋ នៅមុនពេលប្រកាសលទ្ធផលស្ថាពរនៃការបោះឆ្នោតជ្រើសតាំងតំណាងរាស្ដ្រ នីតិកាលទី៥ផងដែរ ៕
