ភ្នំពេញៈ មនុស្ស រាប់រយនាក់ ផ្អើលឈូឆរចុះឡើងៗ ឬផ្តុំគ្នាចាំឃ្លាំមើលជាប់ជាប្រចាំស្ទើរពេញណែន នៅក្នុងមណ្ឌលបោះឆ្នោត សាលាបឋមសិក្សា ចម្ប៉ា នឹងនៅតាមផ្លូវច្រកចូលជាមួយនឹងសំឡេងស្រែកហ៊ោកញ្ជ្រៀវ យ៉ាងទ្រហឹងអ៊ឹងកង រារាំងជនជាតិវៀតណាម មិនឲ្យចូលបោះឆ្នោត បានក្លាយទៅជាព្រឹត្តិការណ៍ដ៏ក្តៅគគុកមួយ ក្នុងចំណោមព្រឹត្តិការណ៍ជាច្រើនទៀត ដែលបានកើតឡើងនៅក្នុងព្រឹត្តិការណ៍នៃការបោះឆ្នោតជាតិកាលពីម្សិលមិញ។ការតវ៉ារបស់ប្រជាពលរដ្ឋរាប់រយនាក់ នៅមណ្ឌលបោះឆ្នោត សាលាបឋមសិក្សា ចម្ប៉ា ក្នុងសង្កាត់ ក្បាលកោះ ខណ្ឌ មានជ័យនេះ គឺបានកើតឡើង ស្របពេលដែលមានសេចក្តីរាយការណ៍ពីភាពមិនប្រក្រតីជាច្រើន នៅតាមការិយាល័យបោះឆ្នោតនានា ក្នុងរាជធានីភ្នំពេញពាក់ព័ន្ធនឹងការបាត់ឈ្មោះ ពីបញ្ជីបោះឆ្នោត ឈ្មោះមានក្នុងបញ្ជីហើយ ត្រូវអ្នកផ្សេងបោះរួច ទឹកថ្នាំជ្រលក់ចង្អុលដៃ ត្រូវបានគេលុបជ្រះ ការតវ៉ាប្រឆាំងជនជាតិវៀតណាម មិនឲ្យចូលបោះឆ្នោតជាដើម។ល។
នៅ ម៉ោងប្រមាណ ១១ និង ៣០ នាទីព្រឹក ប្រជាពលរដ្ឋខ្មែរជាច្រើន ដែលភ្នំពេញ ប៉ុស្តិ៍បានជួបសម្ភាស នៅមណ្ឌលបោះឆ្នោតក្នុងសាលាបឋមសិក្សា ចម្ប៉ា បាននិយាយថា ចាប់តាំងពីម៉ោង ៧ ព្រឹក មកពួកគាត់បានបណ្តេញជនជាតិវៀតណាម ដែលមិនចេះនិយាយខ្មែរច្បាស់ ចេញពីមណ្ឌលបោះឆ្នោតនេះប្រមាណជាង ១០ នាក់។ ក្រុមអ្នកភូមិដែលហាក់បីដូចជាកំពុងមានកំហឹងពុះកញ្រ្ជោល ចំពោះជនជាតិវៀតណាមបានចោទសួរថា«ជនជាតិវៀតណាមទាំងនោះ មានអត្តសញ្ញាណប័ណ្ណសញ្ជាតិខ្មែរ ប៉ុន្តែពួកគេមិនចេះនិយាយភាសាខ្មែរច្បាស់ទេ។ តើពួកគេ បានអត្តសញ្ញាណប័ណ្ណសញ្ជាតិខ្មែរនោះមកពីណា? ខ្មែរមានឈ្មោះ នៅពេលទៅបោះឆ្នោតបែរជាត្រូវគេបោះបាត់ ហេតុអ្វីក៏ដូច្នេះ!»។
លោក ហាន សុធា សកម្មជនគណបក្សសង្គ្រោះជាតិ នៅមណ្ឌលបោះឆ្នោតសាលាបឋមសិក្សា ចម្ប៉ា បានឲ្យដឹងថា៖«អ្នកភូមិគាត់ស្គាល់ជនជាតិវៀតណាម ដែលរស់នៅក្នុងភូមិរបស់គាត់ ម៉្លោះហើយ នៅពេលឃើញជនជាតិវៀតណាមទាំងនោះមកបោះឆ្នោតគាត់ដេញឲ្យត្រឡប់ទៅវិញ ។ពលរដ្ឋគាត់ធ្វើដោយទឹកចិត្ត របស់ពួកគាត់គ្មានអ្នកណាដឹកនាំឲ្យធ្វើទេ»។
នៅឯមណ្ឌលបោះឆ្នោត ក្នុងវត្ត ឫស្សីស្រស់ សង្កាត់ និរោធន៍ នៅម៉ោងប្រមាណ ៩ ព្រឹក និស្សិតវ័យក្មេងប៉ុន្មាននាក់ បានបង្ហាញខ្លួន ដោយផ្តល់ដបសាប៊ូអូសាវ៉ែលដល់អ្នកបោះឆ្នោតរួច ដើម្បីសាកល្បងគុណភាពទឹកថ្នាំខ្មៅជ្រលក់ចង្អុលដៃ។ ដោយទាក់ទាញបានមនុស្សជាច្រើននាក់ នគរបាលមូលដ្ឋាន បានបំបែកពួកគេ ធ្វើឲ្យមានការភ្ញាក់ផ្អើល។
អ្នកបោះឆ្នោតឈ្មោះ ឡាំ ចាន់សុផល អាយុ ៥០ ឆ្នាំ បានថ្លែងថា បន្ទាប់ពីបោះឆ្នោតរួច លោកបានទៅជិតបុរសវ័យក្មេងទាំងនោះ ដើម្បីពិនិត្យមើលថា ទឹកអូសាវ៉ែល ពិតជាអាចលុបទឹកថ្នាំខ្មៅនោះបានឬយ៉ាងណា?
លោក ចាន់សុផល បានថ្លែងថា៖«ខ្ញុំបានមើលដៃស្រ្តីបីនាក់ដែលលាងដោយទឹកអូសាវ៉ែល ពួកគេពិតជាលាងស្អាតមែន។ ខ្ញុំស្ទើរតែមិនជឿ ប៉ុន្តែវានៅចំពីមុខខ្ញុំ»។ លោកបានបន្តថា បន្ទាប់មកនគរបាលបានមកបំបែកក្រុមទាំងនោះ ហើយរឹបអូសយកអូសាវ៉ែល។
នៅ មណ្ឌលបោះឆ្នោតក្នុងវត្ត និរោធន៍ សាលាបឋមសិក្សា បឹងឈូក ប្រជុំវង្ស ដំណើរការបោះឆ្នោត ហាក់បីដូចជាប្រព្រឹត្តទៅមានលក្ខណៈល្អប្រសើរបើទោះបីជាអ្នក បោះឆ្នោតខ្លះបានរអ៊ូរទាំ ដោយសារតែរកឈ្មោះរបស់ខ្លួនមិនឃើញក៏ដោយ។ ចំណែកនៅមណ្ឌលបោះឆ្នោតក្នុងវត្ត ច្បារអំពៅ នៅម៉ោងប្រមាណជា ៨ និង ៣០នាទីព្រឹក ការិយាល័យខ្លះមានមនុស្សឈរតម្រៀបជួរគ្នាយ៉ាងវែង រង់ចាំបោះឆ្នោត ខណៈដែលការិយាល័យខ្លះមិនមានមនុស្សសោះ។ នៅមណ្ឌលបោះឆ្នោតមួយនេះ យូរៗម្តងក្រុមអ្នកសង្កេតការណ៍គណបក្សប្រឆាំងបានប៉ះទង្គិច ពាក្យសម្តីគ្នាយ៉ាងតឹងសរសៃក ជាមួយមន្ត្រីរៀបចំការបោះឆ្នោត នៅពេលដែលប្រជាពលរដ្ឋមួយចំនួនមិនត្រូវបានអនុញ្ញាតឲ្យបោះឆ្នោត ដោយសារតែមិនមានឯកសារត្រឹមត្រូវខណៈដែលប្រជាពលរដ្ឋខ្លះ រកឈ្មោះរបស់ខ្លួនមិនឃើញ៕
រាយការណ៍បន្ថែមដោយ ប៊ុត រស្មីគង្គា និង សែន ដាវិត
ប្រភពពីភ្នំពេញប៉ុស្តិ៍
