កាលពីប្រហែលមួយខែមុននេះ មានការលើកឡើងពីសារព័ត៌មាន និងអ្នករស់នៅក្នុងសង្គមសិល្បៈថា ចំណងស្នេហ៍មីដាដា និង សុធារ៉ា ហាក់ដូចជា
ជួបនឹងវិបត្តិអ្វីមួយដែលធ្វើឲ្យ សឿ សុធារ៉ា ហាក់ដូចមានកង្វល់អ្វីដក់ជាប់នៅក្នុងជម្រៅចិត្តរបស់នាងហាស្តី មិនរួចនោះ។ ប៉ុន្តែឈានចូលដល់ខែកក្កដា នេះ គេបានមើលឃើញកាន់តែច្បាស់ថា ស្នេហានេះកាន់តែរង្គោះរង្គើរហូតដល់ល្បីថា ពួកគេទាំងពីរបានឈានដល់ការបែកបាក់ជាផ្លូវការទៀតផងក្រោយពេលសឿ សុធារ៉ា ជាប្រពន្ធទប់ចិត្តមិនបានក៏ទម្លាយកម្សួលខ្ទុះក្នុងបេះដូងតាមរយៈ ការសរសេរនៅលើហ្វេសប៊ុករបស់នាងជាភាសាអង់គ្លេសថា៖«If u wanna break up it is okay. But I need Pemean. I do»។ ដោយសម្រួសជាភាសាខ្មែរថា៖«បើសិនបងចង់បែក...ក៏បែកទៅចុះ អត់បញ្ហា... ប៉ុន្តែអូនត្រូវការកូនស្រី ពិមាន...»។ ប៉ុន្តែនៅពេលព្យាយាមទាក់ទងរូបនាងដើម្បីសាកសួរព័ត៌មានពិតនោះ សឿ សុធារ៉ា មិនអាចភ្ជាប់បានទេដោយទូរស័ព្ទរបស់នាងត្រូវបានបិទ រីឯទូរស័ព្ទមួយខ្សែទៀតគ្មានអ្នកលើកនោះទេ។
ដោយឡែកនៅពេលទាក់ទងទៅកាន់ក្បាលម៉ាស៊ីនក្នុងគ្រួសារសឿ សុធារ៉ាគឺលោក សាពូន មីដាដា ជាស្វាមីក៏មិនធ្វើឲ្យទស្សនិកជនខកចិត្តដែរ ដោយលោកបាននិយាយយ៉ាងសមរម្យថា ចំពោះរឿងរ៉ាវស្នេហាដែលគេឯងតែងលើកឡើងថា ឈានដល់ដំណាក់កាលបែកបាក់នោះ លោកនឹងលើកមកលាតត្រដាងឲ្យទស្សនិកជនបានជ្រាបច្បាស់នៅពេល ព្រឹត្តិការណ៍បោះឆ្នោតជ្រើសរើសតំណាងរាស្ត្រអាណត្តិទី៥ ចប់សព្វគ្រប់នោះ។
តារាចម្រៀងដែលធ្លាប់ឈរនៅកំពូលតារាងក្នុងអំឡុងឆ្នាំ២០០៤ សាពូន មីដាដា ដែលកំពុងចូលខ្លួនក្នុងដំណើរការឆាកនយោបាយបាននិយាយប្រាប់ភ្នំពេញ ប៉ុស្តិ៍ថា៖«អូ! ចំពោះរឿងនេះ កុំអាលនិយាយអី ឥឡូវខ្ញុំកំពុងជាប់រវល់ឃោសនាការបោះឆ្នោត ដូច្នេះចាំបោះឆ្នោតហើយចាំនិយាយ»។
តែយ៉ាងណាមុននេះ តារាហង្សមាស សាពូន មីដាដា ធ្លាប់បកស្រាយប្រាប់សារព័ត៌មានក្នុងស្រុកថា៖«ខ្ញុំចង់ឲ្យ បងប្អូនរង់ចាំមើលថា ខ្ញុំ និងភរិយាពិតជាបែកបាក់ដូចការលើកឡើងនោះ មែនអត់ ព្រោះថាច្រើនដងហើយ ខ្ញុំ និងភរិយា ក៏នៅតែរស់នៅជាមួយគ្នា។ មិនតែប៉ុណ្ណោះ ខ្ញុំថែមទាំងបានចំណងដៃកូនស្រីសំណព្វចិត្តម្នាក់ទៀតផង»។
នៅពេលចប់បោះឆ្នោតទស្សនិកជននឹងដឹងច្បាស់១០០ភាគរយថា តើសាពូន មីដាដា និង សឿ សុធារ៉ា ពិតជាបែកបាក់គ្នាឬយ៉ាងណា?
គួរបញ្ជាក់ថា សឿ សុធារ៉ា បានចូលប្រឡូកក្នុងវិស័យសិល្បៈនៅឆ្នាំ១៩៩៧ ហើយនៅក្នុងអំឡុងពេលនោះ នាងជាតារាចម្រៀងប្រចាំភោជនីយដ្ឋានហង្សនាគ១ នៅព្រែកលៀប។ តារារូបនេះ កើតនៅក្នុងគ្រួសារអ្នករកស៊ីដែលមានឪពុកឈ្មោះ សឿ ឈៀង និងម្តាយឈ្មោះ ណោ សុខ អ្នកទាំងពីរជាអាជីវករនៅសង្កាត់ទួលទំពូងទី១ ខណ្ឌចំការមន។ សឿ សុធារ៉ា បានរៀបការ៣យប់៣ថ្ងៃជាមួយសាពូន មីដាដា កាលពីខែវិច្ឆិកាឆ្នាំ២០០៩៕
ប្រភពពី postkhmer
