ភ្នំពេញ ៖ វត្តមានរបស់លោក សម រង្ស៊ី នៅមុនការបោះឆ្នោត និង សន្ទុះគាំទ្រខ្លាំងនៃគណ បក្សសង្គ្រោះជាតិសម្រាប់អាណត្តិទី៥នេះ បានធ្វើឲ្យថ្នាក់ដឹកនាំបក្សប្រជាជនកម្ពុជាពិចារណាសម្រាប់ ការបោះឆ្នោតលើកក្រោយៗទៀត។
មិននឹកស្មានថាមានមនុស្សទៅទទួលលោក សម រង្ស៊ី ច្រើនដូច្នេះទេ។ មិននឹកស្មានថាអ្នកគាំទ្រលោក សម រង្ស៊ី សុខចិត្តចំណាយកម្លាំងកាយ ចិត្ត និងថវិកាដោយខ្លួនឯងយ៉ាងដូច្នេះសោះ។ មិននឹកស្មានថា អ្នកគាំទ្រលោក សម រង្ស៊ី ហ៊ានចេញមុខហែរក្បួនឬហ៊ានចេញមុខនិយាយឃោសនាអោយគណបក្សសង្គ្រោះជាតិ ខ្លាំងក្លាយ៉ាងដូច្នេះសោះ។ ទាំងអស់នេះគឺជាការកត់សម្គាល់ និងជាការភ្ញាក់ផ្អើលរបស់មតិសាធារណជនមួយចំនួនធំនៅទីក្រុងភ្នំពេញ។
ចលនាគាំទ្រគណបក្សសង្គ្រោះជាតិមានលក្ខណៈផុសផុលជាងអាណត្តិមុនៗមែន។ ប៉ុន្តែអ្នកវិភាគនានានៅតែប្រាកដថា សម្រាប់អាណត្តិនេះគណបក្សប្រជាជនកម្ពុជាដែលដឹកនាំដោយលោក ហ៊ុន សែន នៅតែបន្តឈ្នះឆ្នោត និងកាន់អំណាចដដែល។
គណបក្សប្រជាជនកម្ពុជានៅបន្តកាន់អំណាចមែន។ ប៉ុន្តែការងើបឡើងនៃសន្ទុះគណបក្សសង្គ្រោះជាតិបាន និងកំពុងធ្វើអោយមេដឹកនាំគណបក្សប្រជាជនកម្ពុជាពិចារណាឡើងវិញអំពី អនាគតនៃគណបក្សរបស់ខ្លួន។ ប្រសិនបើគណបក្សសង្គ្រោះជាតិអាចទាញយកអាសនៈបានច្រើនពី គណបក្សកាន់អំណាចសម្រាប់ការបោះឆ្នោតឆ្នាំ២០១៣នេះ គេប្រាកដច្បាស់ថា គណបក្សប្រជាជនកម្ពុជានឹងធ្វើការកែទម្រង់ស៊ីជម្រៅនៅក្រោយការបោះឆ្នោត នេះតែម្តង។ ការកែទម្រង់របស់គណបក្សប្រជាជនកម្ពុជាអាចមានរាប់បញ្ចូលទាំង ការរុះរើមន្ត្រីជាន់ខ្ពស់មួយចំនួនចោលផងក៏ថាបាន។
ម្យ៉ាងវិញទៀត គណបក្សប្រជាជនកម្ពុជាអាចផ្លាស់ប្តូរយុទ្ធសាស្ត្រដឹកនាំមួយចំនួនសម្រាប់អាណត្តិខាងមុខៗទៀតនេះ។
អ្នកវិភាគអត្ថាធិប្បាយថា ប្រសិនបើសំឡេងបក្សប្រឆាំង និងបក្សកាន់អំណាចកាន់តែប្រកិតជិតគ្នាពីអាណត្តិមួយទៅអាណត្តិហើយ នោះ មានន័យថា ល្បែងប្រជាធិបតេយ្យពិតប្រាកដនៅក្នុងប្រទេសកម្ពុជាបានមកដល់ហើយ៕
សូមទស្សនា ប្រជាពលរដ្ឋចូលរួមទទួលឯកឧត្តមប្រធាន សម រង្ស៊ី ជាង ១លាននាក់ នៅថ្ងៃទី 19 ខែ 7 ឆ្នាំ 2013 ដែលមានវីដេរអូរដូចខាងក្រោម :
