នៅតាមតូបលក់អីវ៉ាន់ និងទូលក់មាសក្នុងផ្សារធំថ្មីសុទ្ធតែមានបិទស្លាកសញ្ញា គណបក្សប្រជាជនកម្ពុជានិងរូបថតលោកនាយករដ្ឋមន្រ្តី ហ៊ុន សែន ដែលតូបនិងទូនីមួយៗយ៉ាងហោចមានបិទរូបបីសន្លឹកដែរ។ ផ្ទុយទៅវិញ រូបសញ្ញាពីគណបក្សនយោបាយដទៃទៀតពុំមានបិទក្នុងផ្សារនោះទេ។
កាលពីថ្ងៃទី១៩កក្កដាកន្លងទៅ ពេលលោក សម រង្ស៊ី វិលចូលមកមាតុប្រទេសក្រោមការស្វាគមន៍គាំទ្រពីមហាជនរាប់ម៉ឺននាក់ លោកថ្លែងទៅកាន់អ្នកគាំទ្រនៅសួនប្រជាធិបតេយ្យដែល នៅមិនឆ្ងាយពីផ្សារធំថ្មីទេ។ក្រុមអាជីវករជាច្រើនមានបំណងទៅ ស្វាគមន៍និងស្តាប់ការថ្លែងជាលើកដំបូង របស់លោក សម រង្ស៊ី។ ប៉ុន្តែ ពួកគាត់ត្រូវកងសន្តិសុខផ្សារហាម។ ដោយមើលឃើញពីការបំបិទសិទ្ធិសេរីភាពបែបនេះ អាជីវករម្នាក់ជាតំណាងបានផ្ញើលិខិតរៀបរាប់ពីការគាបសង្កត់នេះមក កាសែតភ្នំពេញ ប៉ុស្តិ៍ និងប្រព័ន្ធផ្សព្វផ្សាយផ្សេងទៀតក្នុងស្រុក កាលពីថ្ងៃទី២០ ខែកក្កដា។
អ្នកយកព័ត៌មាន ភ្នំពេញ ប៉ុស្តិ៍ ពីរនាក់បានទៅសាកសួរអាជីវករនៅផ្សារធំថ្មីកាលពីម្សិលមិញ អ្វីៗគឺពិតដូចរៀបរាប់នៅក្នុងលិខិតនោះមែន។ អាជីវករភាគច្រើនមិនហ៊ាននិយាយចំហពីបញ្ហានេះនៅក្នុងផ្សារនោះទេ។
តែស្រ្តីវ័យ៣៥ឆ្នាំ ជាអាជីវករលក់ក្រណាត់ម្នាក់បានអះអាងថា គាត់បានដើរចេញពីផ្សារបំណងទៅស្តាប់លោក សម រង្ស៊ី និយាយ ដើម្បីបានដឹងពីគោលនយោបាយរបស់គណបក្សសង្គ្រោះជាតិ ប៉ុន្តែពេលទៅដល់ច្រកទ្វារចេញ ក៏ត្រូវសន្តិសុខហៅឲ្យមកវិញ។
ទំនងខ្លាច មន្រ្តីផ្សារឃើញ គាត់មើលជុំវិញខ្លួនទើបបន្តថា៖ «ថ្ងៃនោះសន្តិសុខបីនាក់នៅយាមទ្វារខ្ញុំអត់ចាប់អារម្មណ៍ទេ គឺគ្រាន់តែចង់ស្តាប់លោក សម រង្ស៊ី និយាយ តែសន្តិសុខម្នាក់ស្រែកឲ្យមកផ្សារវិញ។ ខ្ញុំខ្លាចគេធ្វើបាប ក៏ចូលមកវិញ»។
គាត់បន្តថា ក្នុងផ្សារធំថ្មីនេះមិនអនុញ្ញាតឲ្យផ្សព្វផ្សាយអ្វីទេ បើមានអ្នកណាម្នាក់ពាក់មួកឬអាវគណបក្សសង្គ្រោះជាតិនោះ សន្តិសុខផ្សារនឹងដើរតាមមិនឲ្យនៅយូរ ក្នុងផ្សារនោះទេ។
អាជីវករ ម្នាក់អាយុ៣១ឆ្នាំ ចាត់ទុកថា ៖ «អ្វីដែលគេធ្វើនេះ គឺបិទសិទ្ធិសេរីភាពក្នុងការទទួលព័ត៌មានពីបក្សផ្សេងៗដើម្បីយកមក ថ្លឹងថ្លែងសម្រាប់ធ្វើការបោះឆ្នោត»។
ដោយខ្លាចមានបញ្ហាសន្តិសុខផ្ទាល់ខ្លួន និងមិនចង់ឲ្យប៉ះពាល់ដល់ការរកស៊ីអាជីវករម្នាក់ទៀតសុំមិននិយាយ នៅនឹងតូបលក់ទេ ប៉ុន្តែ បានលបដើរតាមអ្នកសារព័ត៌មានភ្នំពេញ ប៉ុស្តិ៍ រហូតផុតពីផ្សារទើបនាំទៅតូបជាងទងមួយហើយរៀបរាប់អំពីការរើសអើង នយោបាយនិងការគាបសង្កត់មកលើអាជីវករក្នុងផ្សារ ពីសំណាក់អ្នកគ្រប់គ្រង។
អាជីវករម្នាក់នេះអះអាងថា៖«ពីរបីថ្ងៃមុនគណបក្សសង្គ្រោះជាតិ ម្នាក់ចូលមកក្នុងផ្សារ តែសន្តិសុខដេញចេញ។ ដូចពូឃើញអ៊ីចឹងក្នុងផ្សារមានតែរូបបក្សប្រជាជន គ្រាន់តែទូខ្ញុំមួយមានបីបួនសន្លឹក។ បើមិនឲ្យគេបិទខ្លាចមានរឿងព្រោះយើងនៅក្រោមការគ្រប់គ្រងរបស់ គេ។ ផ្សារនេះខុសពីផ្សារផ្សេងៗ»។
ស្រ្តីជាអាជីវករម្នាក់នេះបន្តថា សន្តិសុខផ្សារបានរឹតត្បិតមិនឲ្យអ្នកលក់ដូរគាំទ្រគណបក្សណាក្រៅ ពីបក្សប្រជាជនទេ ហើយបានហាមមិនឲ្យពួកគាត់ស្រែកសាទរ និងលើកដៃស្វាគមន៍ក្បួនហែឃោសនារបស់គណបក្សសង្គ្រោះជាតិដែរ។ លើសពីនោះ កាលពីថ្ងៃលោក សម រង្ស៊ី ថ្លែងសុន្ទរកថា សន្តិសុខផ្សារបានសួរនាំអាជីវករណាដែលមិនមកលក់ ហើយគំរាមកត់ឈ្មោះទៀត បើដឹងថា ទៅស្តាប់លោក សម រង្ស៊ី និយាយនោះ។
បុរសជាជាងទងម្នាក់ក៏អះអាងដូចគ្នាដែរថា៖ «នៅក្នុងផ្សារនេះ បើនិយាយពីបក្សណាក្រៅពីបក្សប្រជាជន គឺមិនបានដាច់ខាត។ គេហៅទៅសួរឥឡូវហ្នឹង។ វាដូចជាហួសហេតុពេក»។
ភ្នាក់ងារព័ត៌មានភ្នំពេញ ប៉ុស្តិ៍ បានទៅកាន់ស្នាក់ការផ្សារធំថ្មី ដើម្បីសុំការពន្យល់អំពីការលើកឡើងរបស់អាជីវករ ប៉ុន្តែមន្រ្តីម្នាក់ដែលអង្គុយអានកាសែតក្នុងនោះ បដិសេធ មិនបំភ្លឺអ្វីទាំងអស់ពាក់ព័ន្ធនឹងករណីនេះទេ។
ប៉ុន្តែយ៉ាង ណា លោក ស្រី ប៉ុន ដានី ប្រធានផ្សារធំថ្មីបានបដិសេធតាមទូរស័ព្ទនូវរាល់ការចោទរបស់ អាជីវករទាំងនោះនិងចាត់ទុកជាការមួលបង្កាច់ការពិត។
លោកស្រី ប៉ុន ដានី បញ្ជាក់ថា៖ «វាមិនពិតទេ។ យើងមិនបានបិទសិទ្ធិសេរីភាពអីទេ។ សូមអ្នកនិយាយមកជួបខ្ញុំហើយរឿងបិទស្លាកនោះគឺអាជីវករជាអ្នកសុំ ទៅបិទខ្លួនឯងទេ»។
លោកស្រី ដានី បញ្ជាក់ដែរថា វាជារឿងធម្មតាដែលសន្តិសុខផ្សារបង្កើនការយាមកាមតឹងរ៉ឹងនៅក្នុង ផ្សារ ដែលមានលក់ដូរមាស ប្រាក់ បែបនេះ៕
ប្រភពពី ភ្នំពេញ ប៉ុស្តិ៍
