ស្ថានការណ៍ជាទូទៅ សម្រាប់ការបោះឆ្នោតសម្រាប់នីតិកាលទី៥នៅកម្ពុជា មានភាពវិជ្ជមានប្រសើរជាងការបោះឆ្នោតនៅអាណត្តិមុនៗ ដោយសាតែអំពើហិង្សាបានថយចុះ ហើយនិងមានវត្តមានប្រធានគណបក្សប្រឆាំង នៅកម្ពុជា។
លោក ធន សារាយ ប្រធានគណៈកម្មាធិការនាយកអង្គការខុមហ្វ្រែល និងជា ប្រធានអង្គការអាដហុក បានថ្លែងក្នុងសន្និសីទព័ត៌មានថា ស្ថានភាព នយោបាយនៅមុនការបោះឆ្នោតមានការធូរស្រាល បន្ទាប់ពីព្រះមហាក្សត្រខ្មែរ បានព្រះរាជទានលើកលែងទោសដល់លោក សម រង្ស៊ី ប្រធានគណបក្សសង្គ្រោះជាតិ ដែលអាចធ្វើឲ្យលោកសម រង្ស៊ី វិលចូលក្នុងទឹកដីកម្ពុជាវិញ។ រីឯការវាយតម្លៃមួយទៀតរបស់អង្គការអង្កេតការ គឺការចូលរួមយ៉ាងសកម្មរបស់យុវជនក្នុងសកម្មភាពនយោបាយ ដូចជាការចូលរួម ក្នុងការហែក្បួនរបស់គណបក្ស និងការហ៊ានបញ្ចេញមតិរបស់ខ្លួន រួមទាំងការតាមដានយ៉ាងយកចិត្តទុកដាក់លើគោលនយោបាយរបស់គណបក្ស នីមួយៗ។
អង្គការអង្កេតការបោះឆ្នោត នៅកម្ពុជាផ្ទាល់ នៅតែកត់សម្គាល់ឃើញពីភាពអវិជ្ជមាន និង ភាពមិនប្រក្រតី ដែលនៅក្នុងនោះ គណបក្សកាន់អំណាចមានប្រៀបជាង គណបក្សប្រឆាំង។
តែទោះជាយ៉ាងណា អង្គការអង្កេតការបោះឆ្នោតទាំងអស់ ក៏បានស្នើឱ្យមានការបញ្ចូលបេក្ខភាពប្រធានគណបក្សប្រឆាំងលោក សម រង្ស៊ី ទៅក្នុងបញ្ជីបេក្ខភាពតំណាងរាស្ត្រ និងបញ្ជីឈ្មោះអ្នកឆ្នោត ដែលអង្គការទាំងនោះអះអាងថា ជាការគោរពនូវព្រះរាជទានលើកលែងទោសរបស់ ព្រះមហាក្សត្រ និងលិខិតបង្រួបបង្រួមជាតិរបស់នាយករដ្ឋមន្ត្រីកម្ពុជា៕
ប្រភពពី RFI
