គណៈកម្មាធិការរៀបចំ ការ បោះឆ្នោត រាជធានីភ្នំពេញបានអំពាវនាវដល់ គណបក្សនយោបាយ និងបេក្ខជនតំណាងរាស្ត្រ ព្រមទាំងភាគីពាក់ព័ន្ធទាំងអស់ ជួយណែនាំដល់អ្នកចូលរួមឃោសនារបស់ខ្លួន ឱ្យប្រកាន់នូវអាកប្បកិរិយាថ្លៃថ្នូរ នៅក្នុងកំឡុងពេលឃោសនា។ កន្លងមក គណៈកម្មាធិការខាងលើ បានសង្កេតឃើញថា មានភាពមិនប្រក្រតីមួយចំនួន ក្នុងពេលយុទ្ធនាការឃោសនាបោះឆ្នោត។ក្នុងកំឡុងពេលដែលយុទ្ធនាការឃោសនាបោះឆ្នោតកំពុងតែដំណើរការ គណៈកម្មាធិការរៀបចំការបោះឆ្នោតរាជធានីភ្នំពេញ បានសង្កេតឃើញមានកើតឡើងនូវភាពមិនប្រក្រតីមួយចំនួននៅភ្នំពេញ ដោយមានយុវជនប្រមាណជាង២០នាក់ ខ្លះមានពាក់មួក ខ្លះពាក់អាវគណបក្ស និងក្រុមខ្លះទៀតមិនបានពាក់សញ្ញាសំគាល់គណបក្សទេ។ ពួកគេ បានជិះទោចក្រយានយន្ត ជ្រែចុះ ជ្រែឡើង ក្នុងល្បឿនលឿន។ សកម្មភាពទាំងនេះវាអាចធ្វើឱ្យមានការស្ទះចរាចរណ៍ ឬបង្កជាគ្រោះថ្នាក់អ្នកដទៃជាដើម។
ដោយសង្កេតឃើញបញ្ហាខាងលើ គណៈកម្មាធិការរៀបចំការបោះឆ្នោតរាជធានីភ្នំពេញ ចេញសេចក្ដីប្រកាស មួយ ដើម្បីអំពាវនាវដល់គ្រប់គណបក្សនយោបាយទាំងអស់ ជួយណែនាំដល់ក្រុមឃោសនារបស់ខ្លួន ឱ្យប្រកាន់នូវភាពថ្លៃថ្នូរ គោរពគោលការណ៍ប្រជាធិបតេយ្យ គោលការណ៍សិទ្ធិមនុស្ស និងគោរពក្រមសីលធម៌។ គោលបំណង គឺចៀសវាងនូវភាពអវិជ្ជមានទាំងឡាយ ដែលអាចបង្កជាអំពើហិង្សា ក្នុងកំឡុងពេលឃោសនា។
បន្ថែមលើនេះដែរ គណៈកម្មាធិការខាងលើក៍បានអំពាវឱ្យអ្នកឃោសនាទាំងអស់ ជាពិសេសដល់ក្រុមយុវជន គោរពច្បាប់ចរាចរផ្លូវគោក ដោយត្រូវពាក់មួកសុវត្ថិភាពនិងមិនត្រូវពិសាគ្រឿងស្រវឹង ក្នុងកំឡុងពេល បើកបរ និងឃោសនាបោះឆ្នោត។
ទន្ទឹមនឹងលិខិតអំពាវនាវខាងលើដែរ សាលារាជធានីភ្នំពេញបានចេញបម្រាមមួយចំនួន នៅក្នុងថ្ងៃ១៦ កក្កដានេះ ផ្ញើទៅគណៈកម្មាធិការរៀបចំការបោះឆ្នោតរាជធានីភ្នំពេញ ឱ្យធ្វើការផ្សព្វផ្សាយបន្តដល់អ្នកឃោសនាបោះឆ្នោត ក្នុងកំឡុងប្រារព្ធពិធីបុណ្យ និងដង្ហែសពលោកតា ហ៊ុន នាង បិតាបង្កើតរបស់លោកនាយករដ្ឋមន្ត្រី ហ៊ុន សែន។
នៅក្នុងបម្រាមដដែល មិនអនុញ្ញាតឱ្យមានការជួបជុំមហាជន និងហែក្បួនឃោសនាបោះឆ្នោតដែលមានបំពងសំឡេង នៅក្នុងកំឡុងពេលប្រារព្ធពិធីបុណ្យសព ចាប់ពីថ្ងៃទី១៣ រហូតដល់ថ្ងៃទី១៧ស្អែកនេះ នៅជុំវិញកំណាត់ដងវិថីមួយចំនួន ជិតផ្ទះបុណ្យ ក្បែរវិមានឯករាជ្យ និងមហាវិថីមួយចំនួនទៀត នៅពេលដង្ហែសព នាថ្ងៃទី១៧ កក្កដាស្អែកនេះ៕
ប្រភពពី RFI
