ជនមិនស្គាល់មុខ បាញ់រះចូលទីស្នាក់ការធំគណបក្សសង្គ្រោះជាតិ

ភ្នំពេញ : មានជនមិនស្គាល់មុខ បានបាញ់ ចូលទីស្នាក់ការកណ្តាលរបស់គណបក្សសង្គ្រោះជាតិ ស្ថិតនៅម្តុំត្រឡោកបែក ខាងជើងស្ពានអាកាស ៧ មករា នៅស្តុបពេទ្យលោកសង្ឃ ក្នុងរាជធានីភ្នំពេញ។ ប៉ុន្តែហេតុការណ៍ ដែលបានកើតឡើងកាលពីម៉ោង ៣ និង ៣០ នាទី ទៀបភ្លឺ ថ្ងៃទី២០ ខែកក្កដា ឆ្នាំ២០១៣ គឺមិនបណ្តាលឲ្យគ្រោះថ្នាក់ដល់ជនណាម្នាក់ទេ។ ប៉ុន្តែគ្រាប់កាំភ្លើងបានទម្លុះទ្វារកញ្ចក់ និងរបស់របរមួយចំនួន ក្នុងទីស្នាក់ការគណបក្សសង្គ្រោះជាតិ។

លោក យ៉ែម បុញ្ញឫទ្ធិ អ្នកនាំពាក្យគណបក្សសង្គ្រោះជាតិ បានថ្លែងថ្កោលទោស ចំពោះអំពើបាញ់ប្រហារទីស្នាក់ការគណបក្សសង្គ្រោះជាតិ ហើយទាមទារឲ្យសមត្ថកិច្ចប៉ូលិស តាមចាប់ខ្លួនជនមិនស្គាល់មុខនោះ យកមកផ្តន្ទាទោសតាមច្បាប់។

លោក យ៉ែម បុញ្ញឫទ្ធិ បានបញ្ជាក់ថា "អំពើបាញ់ប្រហារនោះ ជាការបំភិតបំភ័យដល់សកម្មជនគណបក្សប្រឆាំង ក្នុងអំឡុងពេលយុទ្ធនាការឃោសនាបោះឆ្នោត"។

ប៉ូលិស និងអ្នកកាសែត នាព្រឹកនេះ បានទៅត្រួតពិនិត្យ នៅទីស្នាក់ការគណបក្សសង្គ្រោះជាតិ ស្ថិតនៅផ្ទះលេខ៧២-៧៤ ផ្លូវ៥៩៨ សង្កាត់បឹងកក់២ ខណ្ឌទួលគោក រាជធានីភ្នំពេញ។

តាមសេចក្តីប្រកាសព័ត៌មានរបស់គណបក្សសង្គ្រោះជាតិ អំពើបាញ់ប្រហារនោះ សំដៅទៅលើអ្នកស្នាក់នៅទីស្នាក់ការគណបក្សសង្គ្រោះជាតិ តែមិនត្រូវទេ៕

ប្រភពដើម : CEN

Category