ប៉ោយ ប៉ែត ៖ បុគ្គលិកកាស៊ីណូប៉ោយប៉ែតរីសតចាក់សម្លាប់គ្នាព្រោះតែជម្លោះរឿង ចាក់សាំងម៉ូតូបង្កឲ្យបុគ្គលិករួមការងារម្នាក់រងរបួសធ្ងន់ត្រូវ បានគេបញ្ជូនទៅសង្គ្រោះនៅមន្ទីរពេទ្យបង្អែកកម្ពុជា-ជប៉ុន មង្គលបុរីទាំងយប់ ។ជម្លោះបន្តិចបន្តួចឈានដល់ចាក់គ្នាឲ្យរបួសធ្ងន់នេះបានកើតឡើង កាលពីវេលាម៉ោង១២យប់ថ្ងៃទី១៥ ខែកក្កដា ឆ្នាំ២០១៣ នៅបន្ទប់ជាប់គ្នា ស្ថិតក្នុងភូមិអូរជ្រៅ សង្កាត់-ក្រុងប៉ោយប៉ែត ខេត្តបន្ទាយមានជ័យ។
ជនរងគ្រោះត្រូវបានគេស្គាល់ឈ្មោះហេង ប៊ុនគឹម អាយុ២២ឆ្នាំ ជាបុគ្គលិកកាស៊ីណូរីស៊ត មានតួនាទី ជាឌីល័រ(អ្នកចែកបៀ) មានស្រុកកំណើតនៅភូមិតាសី ឃុំតាមឺន ស្រុកថ្មគោល ខេត្តបាត់ដំបង បច្ចុប្បន្នស្នាក់នៅអគារក្នុងកាស៊ីណូ។
ជនរងគ្រោះបានអះអាងឲ្យដឹងថា នៅមុនពេលកើតហេតុជនសង្ស័យឈ្មោះសេង ភេទប្រុស អាយុជាង២០ឆ្នាំ ជាអ្នករួមការងារជាមួយ និងមានមុខងារអ្នកឈរមើលគេចែកបៀ បានបង្កជម្លោះមកលើខ្លួនមុន ។ ជនរងគ្រោះបានបន្តថា ខ្លួនបានខ្ចីម៉ូតូពីមិត្តរួមការងារឈ្មោះចាន់ថា ដែលស្នាក់នៅបន្ទប់ជាមួយគ្នា ពេលនោះជនដៃដល់រូបនេះបានខ្ចីម៉ូតូមុន ហើយបានចាក់សាំងផងដែរ។ ខណៈដែលខ្លួន(ជនរងគ្រោះ)ទាញម៉ូតូចេញត្រូវជនដៃដល់ដៀមដាមថា «សាំងអាណាអ្នកចាក់» គ្រានោះក៏កើតជម្លោះពាក្យសម្តីឡើង ហើយជនដៃដល់ក៏យកកាំបិតចុងស្រួច ចាក់កណ្ដៀបក្អមខាងឆ្វេងបណ្តាលឲ្យខ្លួនរងរបួសធ្ងន់តែម្ដង។
បើតាមការអះអាងពីក្រុមគ្រូពេទ្យឲ្យដឹងថា ជនរងគ្រោះត្រូវជនដៃដល់ចាក់ឲ្យរបួសធ្ងន់និងប៉ះពាល់ ដល់សួត និងត្រូវធ្វើការវះកាត់ទៀតផង។
ករណីខាងលើនេះគេនៅពុំទាន់ដឹងថា សមត្ថកិច្ចនឹងចាប់ខ្លួនជនដៃដល់នៅឡើយទេ ខណៈដែលជនរងគ្រោះនៅពុំទាន់បានដាក់ពាក្យបណ្ដឹងទៅឡើយ តែតាមសេចក្តីរាយការណ៍ពីបុគ្គលិកនៅក្នុងកាស៊ីណូខាងលើនេះបានរត់គេច ខ្លួនពីកន្លែងការងារបាត់ហើយ ៕
_______________________
ប្រភពព័ត៌មានពី៖ នគវត្ត
